Për t’u njohur më afër me realizimin e projekteve, përkatësisht zhvillimin e punimeve të ndërtimit të rrugëve në komunën e Podujevës, ministri i Infrastrukturës, Fehmi Mujota me bashkëpunëtorë, i vizitoi këto rrugë.

Fillimisht ministri Mujota e vizitoi rrugën e re të sapoasfaltuar të fshatit Shakovicë. Kjo rrugë ka një gjatësi prej rreth 1 kilometër e gjysmë dhe është në procedure[ të pranimit teknik nga ana e Ministrisë.

Ministri Mujota po ashtu inspektoi punimet e rrugës së fshatit Herticë, me degët e saj: “Hasan Ramadani”, “Pollum”  dhe “Muqollët”. Kjo rrugë ka një gjatësi prej 12 kilometrash. Realizimin e këtij projekti, që ka kushtuar 4 milionë e 700 mijë euro, e ka financuar Ministria e Infrastrukturës, ndërsa punimet është duke i kryer kompania “Domestion”.

Ministri Mujota u shpreh i  kënaqur me zhvillimin e këtyre punimeve dhe kërkoi nga punëkryerësi që ato të kryhen në afatin e paraparë.

Asfaltimi i kësaj rruge pritet që të kryhet më 15 shtator të këtij viti.