Me ftesë të komisionerëve, znj. Violeta Bulc dhe z. Johannes Hahn, ministri i Infrastrukturës, Lutfi Zharku mori pjesë në takimin ministror të WB6 “Konektiviteti në Ballkanin Perëndimor” , të mbajtur në Riga të Letonisë. Takimi u mbajt dy muaj pas definimit të rrjetit bazik në Ballkanin Perëndimor , që u bë në takimin e kryeministrave të WB6 në Bruksel dhe i cili i paraprin takimit të ardhshme, që mbahet në fund të gushtit në Vienë si vazhdimësi e procesit të Berlinit. Në rrjetin gjithëpërfshirës të Ballkanit Perëndimor tashmë është shtuar edhe linja hekurudhore Prishtinë – Podujevë, e cila vazhdon deri në Nish, ndërsa do të shqyrtohet më tutje nga SEETO edhe përfshirja e rrugës Prishtinë – Gjilan – Dheu i Bardhë. Sa i përket rrjetit bazik, projekti i autostradës Prishtinë – Merdar është përfshirë në listën indikative të projekteve për mbështetje të pjesërishme financiare nga ana e BE-së.

Në margjinat e takimit ministri diskutoi çështje të interesit të përbashkët me ministrat homologë të rajonit e në veçanti me ministrin e transportit të Shqipërsie, z. Edmond Haxhinasto dhe ministrin e transportit të Maqedonisë, z. Vlado Misajlovski.